Portivechju, versu una vera cità immersiva
Fà di a lingua corsa una rialità visibuli, viva è trasmissa à tutti i ghjorna, in u spaziu publicu com’è in a vita municipali.
Una visioni par oghji, una rispunsabilità par dumani
In Portivechju, a lingua corsa ùn si devi d’essa vista solu com’è un simbulu… ma puri com’è una rialità di tutti i ghjorna. A lingua hè in cori ‘lla noscia identità, quidda ‘lli Purtivechjacci, quidda ‘lla Corsica, quidda ‘lla noscia stodia è ‘llu nosciu avvena.
Oghji, trà i discursa è a rialità truvemu chì u fossu hè largu è chì l’azzioni à prò di a lingua sò stati minimi. Mancaia forsa ‘ssa brama di fà di a lingua un punteddu maiori.
Da a nosci parti, vulemu fà di Portivechju una vera cità immirsiva, in un’azzioni cuncreta è ambiziosa.
Una scelta pulitica chjara
Prupunimu chì Portivechju s’arrichischi di u labellu « Paesi è cità immirsivi » vutatu à l’unanimità da l’Assemblea di Corsica.
Una cità immirsiva ùn devi micca essa una prumessa eletturali, ma piuttostu un prughjettu cuncretu chì devi piddà sensu in un tarritoriu induva a lingua hè :
- Visibuli in u spaziu publicu
- Viva in tutti i sirvizii, a scola è a vita suciali
- Spartuta in a cultura, u sportu è u mondu assuciativu
- Insignata è trasmissa da a prima zitiddina è sin’à a furmazioni
A pudemu fà, a vulemu fà è a faremu.
A noscia andatura
- Dà a a lingua a so piazza in a vita municipali
Renda a so piazza à a lingua in i cunsiglia municipali, un accolta bislingua in i sirvizii, è una cumunicazioni chì pidda di più in contu a lingua corsa. - Fà di a scola una priurità
Sviluppu ambiziosu di i filieri bislingui, sustegnu à i prughjetta immirsivi, furmazioni di u parsunali, sviluppu di l’attività perisculari. - Rinfurzà u mondu assuciativu
Dà un sustegnu francu, strutturatu è durèvuli à l’associ chì s’impegnani à prò di a lingua. - Fà di a lingua una forza ecunomica
Pulitica bislingua in leia incù a Cumunità di I Cumuni di u Stremu Miridianu, turisimu culturali identitariu, ricunniscenza di a maistria di u corsu com’è valori prufissiunali. - Una primura culturali forti
Prugrammazioni rinfurzati, sustegnu à l’attori culturali è à l’artisti lucali, infrastrutturi culturali à u sirviziu di a criazioni in lingua corsa.
U nosciu impegnu
Ùn si parla micca di simbolica, si parla di scelta è d’impegnu, di brama è di primura schietta, unestia è sinceri.
Strutturà, bugittà, valutà, fà è ùn dì.
Fà di Portivechju una cità immirsiva hè una dicisioni pulitica. Hè dinò una rispunsabilità à prò ‘lli nosci fiddoli è ‘llu nosciu dumani à tutti.